ეს გოგო ნათია ქარჩილაძეა, 22 წლისა. ოზურგეთში დაიბადა. სკოლის პერიოდში, სხვა გოგონებისგან განსხვავებით, უყვარდა სპორტი. განსაკუთრებული სიყვარულით თამაშობდა ფეხბურთს, კალათბურთსა და ჩოგბურთს. ბავშვობაშივე გაიცნო ადამიანები, რომლებიც დღეს მისი საუკეთესო მეგობრები არიან. როგორც ამბობს, მათ დიდი გავლენა მოახდინეს მისი პიროვნების ჩამოყალიბებაზე.
ამჟამად, თბილისის სახელმწიფო უნვერსიტეტში სოციოლოგიასა და გენდერს სწავლობს. უყვარს ადამიანები, მათზე დაკვირვება და მათთან ურთიერთობა, ამიტომაც სოციუმი და მასში არსებული გენდერული თავისებურებები საინტერესოა მისთვის. სწავლის გარდა, ჩართულია სამოქალაქო აქტივიზმში. აქტიურად მონაწილეობს საპროტესტო აქციებში, რომელთა ძირითადი მოთხოვნები ქალთა უფლებებს, შრომით ურთიერთობებს, განათლებას, ნარკოპოლიტიკას და სხვა ჩაგრულს ჯგუფების ინტერესებს ეხება.
ნათიას მკვეთრად აქვს განსაზღვრული პოლიტიკური ხედვები, პოლიტიკური, ის სოციალისტ-ფემინისტია. არ აღიარებს რელიგიას. თავისუფლება მისთვის ბევრი ალტერნატივის არსებობაა. მისი მთავარი დევიზი, ამჟამად, სულ ორი სიტყვაა და ასე ჟღერს: – ავტონომია უნივერსიტეტს!
საყვარელი მწერალი არ ჰყავს, არც რომელიმე ნაწარმოებს გამოარჩევს. ამბობს, რომ კითხვისას მთავარი სიტუაცია, დრო, განწყობა და ხასიათია. თავის ჩაცმულობის სტილს აღწერს როგორც ფერადოვანს. უსმენს ყველა ჟანრის მუსიკას, ამჟამად სოციალური თემატიკაზე შექმნილ კომპოზიციებს ანიჭებს უპირატესობას.
☼ ეძებ IT ინჟინერიის შემსწავლელ კურსებს? გაეცანი სასწავლო პროგრამებს EDU.ARIS.GE-ზე ☼
გართობის საუკეთესო საშუალება მისთვის სახლში მეგობრებთან ერთად დალევა, ან ბუნებაში გასვლაა. ყველაზე დიდ გულშემატკივრებად ოჯახის წევრებს მიიჩნევს, თუმცა, ფიქრობს, რომ მის წარმატებასა თუ წარუმატებლობას უბრალო ნაცნობებიც იზიარებენ. და ბოლოს, არ აქვს კონკრეტული ადგილი, სადაც თავს საუკეთესოდ გრძნობს. მისთვის, მთავარი ის ადამიანები არიან, ვინც გვერდით ჰყავს.
ავტორი: ნათია ზარიძე
