2026 წლის საერთო სამაგისტრო გამოცდებში მონაწილეობის მსურველებისთვის რეგისტრაცია უკვე დაიწყო და მიმდინარეობს მხოლოდ ელექტრონულად, შეფასებისა და გამოცდების ეროვნული ცენტრის ვებგვერდზე – online.naec.ge
მაგისტრანტობის კანდიდატთა რეგისტრაცია 11 მაისის 18:00 საათამდე გაგრძელდება.
იხილეთ: „გზამკვლევი მაგისტრანტობის კანდიდატებისათვის“
გზამკვლევი მოიცავს დეტალურ ინფორმაციას რეგისტრაციის ვადების, გამოცდის ფორმატის, ტესტის სტრუქტურის, საგამოცდო დროის, შეფასების სისტემისა და მოქმედი წესების შესახებ. დოკუმენტში, ასევე, წარმოდგენილია უმაღლესი საგანმანათლებლო დაწესებულებების სამაგისტრო პროგრამების ჩამონათვალი.
საერთო სამაგისტრო გამოცდაში მონაწილეობის მიზნით, აპლიკანტმა რეგისტრაციის პროცესში, არაუგვიანეს 6 მაისის 18:00 საათისა, უნდა უზრუნველყოს შესაბამისი საფასურის გადახდა, რომლის ოდენობა შეადგენს 50 ლარს. აღნიშნული ვადის გასვლის შემდეგ, 6 მაისის 18:00 საათიდან 11 მაისის 18:00 საათამდე პერიოდში, კანდიდატებს მხოლოდ საგამოცდო ქალაქის არჩევა ან ცვლილება, ასევე, უკვე დაწყებული რეგისტრაციის დასრულება შეეძლებათ.
საფასურის გადახდა ხორციელდება „საქართველოს ბანკის“ პლატფორმების მეშვეობით, კერძოდ, ონლაინ გადახდის სისტემით (bogpay.ge), ინტერნეტ ბანკით (ibank.ge), მობილური აპლიკაციით (mBank) და თვითმომსახურების ტერმინალებით.
bogpay.ge – გადახდის დეტალური ინსტრუქცია
ibank.ge – გადახდის დეტალური ინსტრუქცია
უმაღლესი განათლების რეფორმის ფარგლებში, სახელმწიფო უმაღლეს საგანმანათლებლო დაწესებულებებში მაგისტრატურის საგანმანათლებლო პროგრამებზე სწავლა სრულად ფინანსდება სახელმწიფოს მიერ.
საერთო სამაგისტრო გამოცდის ტესტი ოთხი ნაწილისაგან შედგება – წაკითხულის გააზრება, ანალიტიკური წერა, ლოგიკური მსჯელობა, რაოდენობრივი მსჯელობა. გამოცდა წარმატებით ჩაბარებულად ითვლება იმ შემთხვევაში, თუ აპლიკანტი ტესტის ოთხი კომპონენტიდან დადგენილ მინიმალური კომპეტენციის ზღვარს სამში მაინც დააკმაყოფილებს. გასათვალისწინებელია, რომ ცალკეული სამაგისტრო პროგრამების შემთხვევაში შესაძლებელია, მოთხოვნილი იყოს ოთხივე კომპონენტში მინიმალური კომპეტენციის ზღვრის გადალახვა.
სამაგისტრო პროგრამაზე სწავლის გაგრძელების აუცილებელ პირობას საერთო სამაგისტრო გამოცდასთან ერთად უმაღლესი საგანმანათლებლო დაწესებულების მიერ განსაზღვრული გამოცდის/გამოცდების ჩაბარება წარმოადგენს.
საერთო სამაგისტრო გამოცდის ჩატარებას შეფასებისა და გამოცდების ეროვნული ცენტრი უზრუნველყოფს, ხოლო შიდა გამოცდებს – შესაბამისი უმაღლესი საგანმანათლებლო დაწესებულებები. შიდა გამოცდებში მონაწილეობის მისაღებად მსურველებმა შესაბამის უმაღლეს საგანმანათლებლო დაწესებულებას უნდა მიმართონ.
ასევე იხილეთ:
განახლებადი ინფორმაცია გამოცდების შესახებ
