„სტუდენტობა მნიშვნელოვანი ახალი ეტაპია ცხოვრებაში“,- ეუბნება EDU.ARIS.GE-ს ნიკოლოზ თამაზაშვილი, რომელმაც ერთიან ეროვნულ გამოცდებზე 100%-იანი სასწავლო გრანტი მოიპოვა და ივანე ჯავახიშვილის თბილისის სახელმწიფო უნივერსიტეტის სტუდენტი გახდა.
ნიკოლოზი „მწვანე სკოლის“ კურსდამთავრებულია და მალე, მიღწეული წარმატების შედეგად, სწავლას ტურიზმის საგანმანათლებლო პროგრამაზე დაიწყებს.
როგორც თვითონ ამბობს, პროფესია პროფესიისთვის არ აურჩევია და ტურიზმზე ჩაბარება განსაკუთრებული დაინტერესებისა და პრაგმატული მოსაზრების გათვალისწინებით გადაწყვიტა.
„პროგრამა, რომელზეც ვისწავლი, ძალიან მაინტერესებს. ზოგადად, ტურიზმის სფერო მომწონს. ასევე, მოგზაურობით ვიყავი ყოველთვის დაინტერესებული. სხვადასხვა ქვეყანასთან დაკავშირებულ ინფორმაციას ინტერნეტით ვიძიებდი და მათ კულტურას, პოლიტიკას ვეცნობოდი. გარდა ამისა, საკითხს პრაგმატულად ვუყურებ – თუ კარგად ვისწავლი, კარგი სამსახური და შემოსავალი მექნება“, – ამბობს სტუდენტი.
ნიკოლოზის თქმით, 100%-იანი სახელმწიფო გრანტის მოლოდინი არ ჰქონდა, თუმცა ზუსტად იცის, რომ ამ შედეგის მიღებაში საგნების სიყვარული დაეხმარა.
„ჩემთვის ძნელად დასაჯერებელი იყო, რომ 100%-იანი გრანტი ავიღე, იმიტომ, რომ ძალიან სერიოზულად არ ვემზადებოდი. უცხოურ ენასთან, ქართულ ენასა და ლიტერატურასთან ერთად, ისტორია და გეოგრაფიაც ჩავაბარე. ვმეცადინეობდი, მაგრამ ტვინს არ ვასხამდი. სწორედ ამიტომ, ვფიქრობ, წარმატების მიღწევაში ამ საგნების სიყვარული დამეხმარა. ჩემი შედეგი ახლობლებს, რა თქმა უნდა, გაუხარდათ.
ვფიქრობ, სტუდენტობა მნიშვნელოვანი ახალი ეტაპია ცხოვრებაში, მაგრამ ჯერ ვერ წარმომიდგენია რა და როგორ იქნება. ვულოცავ ყველას სტუდენტობას და წარმატებას ვუსურვებ. მნიშვნელოვანია ჩვენი ქვეყნისა და სამყაროსთვის, რომ საუნივერსიტეტო ცხოვრებას ასეთი კარგი ხალხი შეემატა“, – უთხრა ნიკოლოზ თამაზაშვილმა EDU.ARIS.GE-ს.
