დღეს, 3-საათზე სტუდენტებმა თბილისის სახელმწიფო უნივერსიტეტის თვითმმართველობის წინააღმდეგ აქცია გამართეს: ყველა სტუდენტი თანასწორია – არა სტუდენტური თვითმმართველობის პრივილეგიებს! ამ ლოზუნგით სტუდენტებმა თვითმმართველობის მიერ ბიუჯეტის არამიზნობივი ხარჯვა გააპროტესტეს. აქცია რამდენიმე საათის განმავლობაში ხმაურით მიმდინარეობდა.
მონაწილეები თსუ-ის თვითმმართველობის მიერ თანხების არამიზნობრივ ხარჯვასა და ამ საკითხთან დაკავშირებით უნივერსიტეტის ადმინსტრაციის უყურადღებობას აპროტესტებდნენ. გარდა ამისა, ისინი 10 მარტს დაგეგმილ კანცლერის არჩევნებს აპროტესტებენ, რადგან დარწმუნებულები არიან, რომ ამ თანამდებობაზე გიორგი გაფრინდაშვილს დანიშნავენ. იმ ადამიანს, რომელიც, მათი თქმით, ადრე თვითმმართველობის წევრი იყო და არასინდისიერად ასრულებდა საკუთარ მოვალეობებს.
აქციამ მოგვიანებით თსუ-ის რექტორის, ვლადიმერ პაპავას, კაბინეტთან გადაინაცვლა, სადაც აქციის მონაწილეები მასთან შეხვედრასა და საუბარს მოითხოვდნენ. სტუდენტებმა უარი განაცხადეს დახურულ კარს მიღმა შეთანხმებებზე და უშუალოდ, ყველა სტუდენტის თანდასწრებით, მოითხოვეს საბჭოს წევრებთან შეხვედრა. თუ ვლადიმერ პაპავა არ დააკმაყოფილებს მათ მოთხოვნებს ისინი აქტიურად გააგრძელებენ საპროტესტო აქციებს.
☼ გსურს შეისწავლო მენეჯმენტი? გაეცანი სასწავლო პროგრამებს EDU.ARIS.GE-ზე ☼
მოამზადა: ნათია დაშნიანმა
